鄭俊弘 (Fred)背住有米未婚妻Beebs偷嗒何雁詩(Stephanie)後,誠信與形象破產,潛水放假一排以為可以洗底,實際上大把手尾要跟!為保前途, 鄭俊弘 近月把戀情低調,與女友甚少見面,為人多疑的何雁詩有感男友有意淡化戀情疏遠自己,多次上門 check手機繼而大吵大鬧,二人陷入冷戰中!為激鄭俊弘,何雁詩早前被影到與男友人拖手過馬路,又被發現左手前臂有傷痕疑自殘。以為執到寶的鄭俊弘原來執到個計時詐彈,好明顯驚到想縮沙~

黐身何雁詩 多疑 check手機

鄭俊弘被爆背拍拖3年多的未婚妻Beebs偷嗒何雁詩,疑似一腳踏兩船被封「賤男」,事業大受影響,近幾個月工作量及曝光率都大幅減少,只有上載去跑步、飲咖啡等照片去社交網。而為了洗底,佢刻意與女友何雁詩保持距離,鮮有見面。上月二人在《勁歌金曲優秀選第一回》同場合照,雖齊聲否認被公司棒打,但二人明顯貌合神離。

鄭俊弘 為保事業 少見何雁詩

據知 鄭俊弘 以為高調認愛可以力挽形象,點知仲衰多幾錢重,但為了演藝事業,佢呢排成日借籌備唱片為由,話冇時間同女友見面。但何雁詩向來戀愛大過天,之前拍咁多次拖都因為佢太黐身而嚇走啲仔,依家佢就成日覺得男友會出去媾女,試過踩上去對方屋企質問,又check晒電話啲短訊,吵完一大輪到依家都未好番。女友愈箍得緊, 鄭俊弘 就愈覺得恐怖,關係已陷入僵局。

早前鄭俊弘拍住唐詩詠拍護膚品廣告,他更即場做live以示自己有工開。

形象插水的鄭俊弘粉絲走得就走,歌迷會中的活躍份子驟減,鄭俊弘為氹米飯班主曾承諾會把戀情低調處理。

疑手自殘 何雁詩澄清:我冇自殺

事實上, 鄭俊弘 與何雁詩認愛後如同攬炒,男的被雪,女的形象亦唔見得好,被指是「小三」的何雁詩疑因戀情受壓而患情緒病,更有傳佢早前壓力爆煲醉酒手自殘,要入院縫了7、8針。日前佢約陳瀅與劉佩玥等好姊妹打邊爐澆愁,就同一位「恤衫男」特別好傾,離開時更被男方拖實過馬路。期後被問及是否與鄭俊弘已分手?何雁詩笑着否認:「感情一直都冇變,只係想低調啲。」對於是否拖累鄭俊弘,佢表示:「冇得咁樣計,我哋冇咁諗,唔想有任何情緒影響工作,男友依家好開心,日日彈結他。」

早前何雁詩把一張穿背心的相放上網,被發現左手前臂現兩條疤痕。
期後她身穿長袖衫出席活動時解釋:「近來都會靜啲,少啲po相,唔交代太多喇!我只可以講,我冇自殺。」

何雁詩坐馬桶 直播唱慘情歌

睇得出 鄭俊弘 想棄女保前途,不過以何雁詩的作風一定咬住唔放,仲可能繼續做出過激行為。近日 鄭俊弘 積極地表現自己有望出雪櫃,更在Big Big Channel直播拍廣告的現場情況,而何雁詩則繼續癲得,在Big Big Channel上載兩條片都好神化,又扮emoji表情又坐馬桶唱歌,咁趕客hit rate當然麻麻。

何雁詩首次在Big Big Channel玩直播,聲言是表演「演技大爆發」,見佢不停扮emoji公仔的搞笑表情,完全唔怕樣衰趕客,最後仲扮埋狗。

另一個直播改在廁所內坐住馬桶進行,話自己沖完涼的何雁詩七情上面,但點解個廁所咁似公廁格局嘅?
潛水多月的鄭俊弘話要積極籌備第3張唱片,放假會跑步、打泰拳及高爾夫球,不過近日見佢眼尾紋同眼袋都出晒嚟,驚變伍小生伍衛國。

何雁詩 情場仔見愁

24歲的何雁詩曾與林師傑、謝東閔拍過拖,又曾在拍劇時姣黐周柏豪,為人主動又黐身,係仔都怕怕。年前被影到去謝東閔屋企經營的按摩店搵男友,遇上謝父一樣死纏傾偈。

 

来源:东方新地

 

Like 玩嘢兄弟团 Facebook!带大家玩翻全马high翻天~❤

Like Viralcham 面子书不出门也能知天下事 > 请点我