Marvel大片《美國隊長3︰英雄內戰》(Captain America︰Civil War) 終於上映！！！兩大超級英雄美國隊長及Ironman由盟友變敵人，各帶領一派英雄爆發內戰，打到飛起，多段預告片都睇到大家熱血沸騰！為了令大家入場睇得更投入，《新地網》和超立方為大家解構故事內容，讓大家對Marvel世界有更深入認識！我們去片！！
電影漫畫導火線不同
雖然電影都係以原著漫畫《內戰》的故事為軸心，但原來漫畫與電影引發事件的導火線不同。預告片中，我哋見到美國隊長除咗唔認同超級英雄需要受到規管，亦都係為了保護好友寒冷戰士Bucky；而政府則認為復仇者聯盟過往的戰鬥對平民造成大量傷亡，所以必須受監管。
原著漫畫中的導火線，係因為一隊名為New Warriors的年輕超級英雄，以拍攝真人show的方式追捕反派，結果反派之一Nitro自爆，造成包括許多小童在內的近600個平民死亡。於是公眾開始群起反對超級英雄，認為佢哋係一班空有超能力的危險人物，必須受到規管。
呢個時候，本身沒受到廣泛支持的英雄註冊法案 – 《The Sokovia Accords》再次獲得關注，呢項法案要求每個超級英雄都要披露自己真實身分，由政府監管，類似係做公務員咁。呢個時候Marvel世界的英雄就分成兩大陣營(不包括中立)，以Ironman為首的註冊派和美國隊長為首的反註冊派，註冊派接受政府任命，而不願註冊的超級英雄則開始被神盾局追捕。
大家最期待的當然係超級英雄大混戰，在原著漫畫中，《英雄內戰》中大部分Marvel世界的超級英雄都會悉數登場，加加埋埋超過200人！咁電影當然唔可能做到，根據消息，雙方陣營如下︰
註冊派︰
鐵甲奇俠(Ironman)
黑寡婦(Black Widow)
戰爭機器(War Machine)
幻視(Vision)
蜘蛛俠(Spider-man)
無錯！擁有蜘蛛俠版權的Sony將與Marvel合作，讓蜘蛛俠可以同其他英雄一家團聚，並由19歲英國嫩口男星Tom Holland出演。預告片中見到佢一出場就將美國隊長的盾牌搶走，好有型！
反註冊派︰
美國隊長(Captain America)
寒冬戰士 (Winter Soldier “Bucky”)
蟻俠(Ant-man)
飛隼(Falcon)
紅女巫(Scarlet Witch)
鷹眼(Hawkeye)
小知識︰
(一) 飛隼在漫畫中是支持註冊法的，不過在電影系列佢一直係美國隊長的親密戰友，所以就順理成章轉成反註冊派。
(二) 漫畫中蜘蛛俠一開始是註冊派的一方，更向世人展示自己係Peter Parker的身分，不過經歷重重戰鬥後，決定跟隨美國隊長。
新角色 黑豹(Black Panther)
如果大家有睇《復仇者聯盟2︰奧創紀元》，就會記得電影中段曾提及東非國家「Wakanda」，這地方被設定為特殊金屬「汎合金」(Vibranium)的出產地，「汎合金」也就是美國隊長盾牌的原材料。而呢個地方，正正就係今集首次登場的超級英雄、黑豹(Black Panther)的故鄉。
黑豹本名T’Challa，係烏干達的國王，「黑豹」只係該國領袖代代相傳的名號，所以其實T’Challa之前已經有過好多個「黑豹」。
黑豹服食心形草藥後獲得超乎凡人的速度、敏銳度、氣力、耐久力及體力，佢同時集多門武術技巧於一身。在原著漫畫中，黑豹為了測試自己的能力，佢曾邀請神奇4俠(Fantastic Four)去到Wakanda參觀，並且突襲對方。結果黑豹竟然將神奇4俠四人一一擊倒，可見佢威力非常驚人…
唔好以為黑豹只係好打，佢擁有牛津大學物理學博士學位，係一個優秀的發明家，利用國內的「汎合金」打造各種高科技武器，使國力日漸強大。
根據原著漫畫以及Marvel初期的消息，黑豹將會處於中立，唔站在Ironman或者美國隊長任何一方。不過電影中復仇者聯盟曾在Wakanda造成嚴重傷亡，所以黑豹會加入Ironman的陣營。我哋在預告片中見到黑豹同Bucky有多場打鬥，亦有美國隊長追捕黑豹的情節。
黑豹隨後亦會推出獨立電影，本預計於2017年上映，後延後至2018年7月。片名應該會跟隨一貫傳統，叫「黑豹奇俠」？
原著漫畫 美國隊長之死
內戰期間，雙方都不停質疑自己的立場，開始懷疑自己做的事係對還是錯。美國隊長同Ironman進行最後對決，正當美國隊長想給予Ironman致命一擊時，佢被四周的民眾拉住，呢一刻佢赫然發現英雄們的戰爭幾乎將整個紐約毀掉…於是佢決定投降，接受警察的拘捕。
其後美國隊長被送往法院受審的途中，遭其死敵紅骷髏派出的Crossbones、以及被催眠的Agent 13暗殺身亡。而經過複雜的情節後，Ironman成功說服Bucky接替Steve成為新一代的美國隊長。
雖然電影未上映，Marvel方面又曾經透露本片中會有重要角色死亡( “There will be a big death” )，不過美國隊長今集應該就唔會死！因為《復仇者聯盟3︰無限之戰》將分成上下集，分別於2018年5月及2019年5月上映，美國隊長到時仲要跟復仇者聯盟其他英雄對抗宇宙魔王薩諾斯(Thanos)，今集又點會死！