暑假檔期中西大片輪住上，頭炮有星期四(8/7)上映嘅《寒戰II》！今集除咗郭富城、梁家輝、彭于晏等原班人馬外，仲有神級周潤發加入。飾演大律師嘅發哥霸氣盡露，對住家塊城城兩大影帝都冇難度，幾場鬧交戲都氣勢迫人，難怪城城話同發哥做對手戲等於袋錢落袋，絕對學到野！
除咗發哥，仲有Janice Man都係新加入，佢飾演發哥徒弟兼世姪女，戲份唔少，有場重頭炒車戲都好搶鏡！另外台灣型男楊佑寧亦係今集先有嘅新角色，佢做梁家輝前下屬，亦係彭于晏同黨。
配角搶鏡，今集仲有數之不盡嘅TVB人出現，有啲得1秒過鏡，入場時真係要落足眼力呀！下面幾張相入面，有幾多係你認得樣但講唔出名先？
