洪永城同唐詩詠拍拖一年半以來經歷唔少風雨，近日有傳詩詠契哥馬明介入，搞到詩詠未有接受永城求婚。不過早前詩詠35歲生日，佢同永城就被發現去咗台灣甜蜜慶祝，又曾被影到齊齊去西半山睇樓，似係想早日築愛巢，睇嚟都好事近！話就話傳出好事近，不過永城最近竟被爆與舊愛Bird Tse翻撻！究竟佢係咩人，竟然想同「不能錯過的女友」爭永城？
據知永城2012年主持旅遊節目時，本來已經有個從事金融業的女友Emily，其後認識當時為黃翠如形象指導的Bird，兩個人同樣喜愛夜蒲，可謂一拍即合。之後兩人不時相約流連夜場，愈玩愈埋，Emily終難忍男友花心，狠心分手！雖然永城後來同Bird有過一段情，不過亦係快來快去，無疾而終。
永城詩詠已經係公開一對，本來都冇人會多提佢哋舊日戀事。但有報道指Bird近日就放相上網大晒幸福，自爆係同永城開婚前派對，相中見到佢哋兩人全晚癡到實，Bird仲在佢同永城的合照加咗兩個粉紅色心心，儼如一對戀人一樣！佢仲留言︰「明天我要嫁給你咧~」嘩，擺明係宣示主權喎！
Bird處理同永城的關係一向好小心，FB相片設定為限朋友可以睇，兩人平日在網上的互動亦唔多。但每逢永城現身活動或者有新造型，Bird都會上載對方的照片，仲冠以「洪寶貝」、「熊大大」等親暱稱呼。據知佢哋一眾圍內朋友對兩人重燃愛火並不驚訝，因為Bird經常在朋友面前叫對方做「熊熊」，多年來都對永城念念不忘！
日前本刊影到永城同詩詠現身銅鑼灣街頭，不過詩詠對永城一直不瞅不睬，去到咖啡室後只顧同女友人傾偈，身旁的永城好似透明人一樣。似乎嬲爆爆！
呢次同永城疑似愛火重燃的造型師Bird Tse，人稱阿雀，從事造型工作多年，以作風前衛大膽見稱。Bird為唔少雜誌、電影、MV負責Styling，同時亦係專欄作家。同佢合作過的藝人可不少，包括鍾舒漫、鍾舒祺、鄧麗欣、謝安琪、周汶錡等，所以同唔少圈中人稔熟。
本來詩詠都疊埋心水，視永城為終身伴侶，但如今再受情傷，睇嚟契哥馬明之前叫詩詠「睇定啲」，確係有先見之明呀！
来源：东方新地