不是吧？TVB熱播劇《殭》上週日才剛結局，今天就有關於它的續集的劇本流出？而且還是鄭嘉穎PO出來的？
據《新地網》報導無綫話題劇《殭》上星期日播出大結局，講述藍夢南(謝安琪飾)同藍夢瑤(陳凱琳飾)穿越蟲洞去到未來世界，而刑活著(鄭嘉穎飾)成功殺死勁敵凌風(陳山聰飾)後，憑着不死之身苦等一百年，終於可以同夢南再續前緣，係個大團圓結局！
女主角阿Kay在大結局播出後大感不捨，話自己好似失戀咁！佢對觀眾喜歡「藍夢南」呢個角色感到高興，同時話如果有機會的話，都好想可以拍續集！而男主角嘉穎呢日就喺微博上載咗《殭》續集的「劇本」，唔通真係咁快有得睇？
當然就唔係真實劇本啦！其實係一位創意十足的網友分享自己創作的續集「劇本」，故事講述阿刑同變回正常人類的夢南一直過着快樂生活，誰不知夢瑤其實一直放唔低對阿刑的愛，所以逐漸爆發出一股可怕的力量；另外凌風原來並未真正死去，更在夢瑤協助下復活！而復活後的凌風比以前更厲害，阿刑不消一會已敗陣！
為對付凌風，阿刑夢南只好求助於博士，博士講出只有集齊餘下四個不死人，組成五行陣法方可對抗凌風。於是阿刑夢南就重回2015年，尋找其他不死人。最後仲幫續集改埋名︰「殭II不死人傳說」，搞到小編都好想呢個劇本成真！
個故事除咗巧妙地運用夢瑤對阿刑執着的愛，發展成新的情節，又將《殭》中無交代的餘下四個不死人帶回故事主線，實在寫得唔錯！難怪嘉穎都話佢可以去TVB應徵做編劇！