「已逝」父親竟又重生？林志穎淚崩中斷錄影
已經榮升做三子之父嘅「台灣小旋風」林志穎(小志)，生完孖仔後，一屋四條king，不過小志依然樂做湊仔公，湊B餵奶陪玩一腳踢！
小志除咗錫自己小朋友，同過世嘅爸爸亦感情深厚，噚晚「浙江衛視」節目《熟悉的味道》就搵咗小志做嘉賓，主題就係講父親。節目內容最初講吓小志對爸爸嘅回憶，煮吓爸爸鍾意食嘅嘢，錄番爸爸鍾意聽嘅歌，節目仲搵嚟小志嘅兄弟妹妹，感謝對爸爸、二哥小志嘅照顧。原本節目好大路，亦都幾感人，不過去到節目尾聲，就出事啦…事緣小志一路錄製節目，製作單位喺另一邊，就搵人化上特技化妝，扮小志過咗身嘅爸爸。諗住俾個「驚喜」對方。點知小志一見到「爸爸」，情緒即時變得激動，呢個時候攝影機仲將小志個樣嚟個大特寫，睇吓佢個面部表情……最後小志終於忍唔住離開咗拍攝現場，仲用雙手揞住塊面，重新拍攝時，雙眼已變得通紅。有網民事後睇唔過眼，插爆電視台腦殘，亦有網民鬧製作單位諗環節時，冇切身處地諗吓當事人。節目明顯想煽情，但試想想，若果你係小志，望住一個硬膠臉，仲要俾反應，會有咩感想？
