早喺上年12月，方力申跟《壹》仔講過︰「呢個童話故事係咪真係幸福快樂呢？你哋諗好咗我哋應該結婚，咁我哋諗好咗我哋係咪從此就幸福快樂呢？」唔少人都覺得方力申同Stephy一直可以走到最後，原來他們接受《壹》仔訪問時，小方同Stephy嘅感情已出現問題，難怪小方會有咁嘅反思。
Stephy講二人分手時，順道提到佢唔信童話，Stephy︰「呢個世界坦白啲講無童話故事，呢刻你問我哋係咪無爭執，係咪幸福快樂、王子公主？我哋一定唔係囉！我哋係平凡人，我哋有我哋生活，我哋有我哋問題。」現實世界係冇童話，估唔到大家眼中嘅童話主角，會成為佢哋嘅壓力。
Stephy︰「即係其實我哋平時睇啲留言，一見到我哋啲post呀，啲fans會留言：你哋幾時結婚呀？一堆都係咁樣問，跟住又話你哋唔可以分開，你哋分開我哋就唔信愛情㗎喇以後，即係呢個會變成無形少少壓力嘅。」單親長大嘅Stephy唔信婚姻，但係小方想結婚，難怪Stephy話希望成全對方去搵一個更適合嘅人。
「婚姻究竟係一件咩事？結婚係一件咩嘅意義？我成日覺得，我好怕自己陷入咗一個婚姻枷鎖囉！令到兩個人係制約令大家唔可以分開，咁你有咗嗰個壓力之下，你本身唔係咁樣諗，但你會無形有壓力令自己好想逃離呢個框框，咁就會變咗好多壓力，或者會覺得個感情已經唔再係以前咁單純囉。」Stephy說。
