《城寨英雄》今個星期進入結局篇， 當年殺死段通天(袁偉豪分飾) 的幕後大佬終於現身，城寨英雄們將跟殺手組織決一死戰！不過胡定欣早前提醒觀眾，睇劇時要準備紙巾，因為劇情會非常催淚！繼小智(李日昇飾) 在日前一集慘被炸死，段家診所眾師兄弟亦將會遭滅門！至於拳佬(陳展鵬飾) 與刁蘭(胡定欣飾) 的戀情，亦未能開花結果……
日前劇情講到柯萬長(張國強飾) 暗中購入大批炸藥，計劃在和頭酒上將福利會眾人炸死，其中小智為救師叔折韁(何啟南飾) 慘被炸死！牙佬眾人悲痛不已。及後拳佬及花曼搵到柯萬長匿藏的地方，兄妹合力將佢打低！
之後柯萬長將當年段通天被殺一事道出，佢話當年自己與福壽金、馮春美早就待在羈留所準備殺死朝猛山，所以段通天之死根本與佢哋三人無關，咁到底牙佬爸爸係邊個殺死？下頁有分曉！
柯萬長本打算威脅楊竹鑾(歐瑞偉飾) 運佢離開城寨，豈料對方表面和善但武功奇高，柯萬長完全不敵！
然後楊老闆道出自己其實係殺手組織中人，而且當年就係佢殺死段通天！依家佢混入城寨假裝砵仔糕廠老闆，就係準備稱霸城寨，操控所有黃、賭、毒事業！
其實老早有唔少觀眾都估到楊老闆唔係普通人，依家佢真正身份終於揭開，而且佢再爆料，原來佢同柯萬長老婆有一腿，所以柯德莉(劉佩玥飾) 其實係楊老闆個親生女！柯萬長知道呢個驚人真相後，就戴住綠帽被楊老闆打死……
柯萬長雖然壞，但畢竟愛女如命，咁樣死去實在令人惋惜。不過都未算慘，在日前TVB上載的預告片中可見，一個神秘人突襲段家牙醫診所，段折僵遂率領眾師兄弟抗敵。
不過鏡頭一轉，就見到牙佬嚇到呆晒咁四處張望，亦見到診所其他人倒在地上。其後牙佬抱住一個戴眼鏡的男人(估計係折韁) 痛哭，段氏慘被滅門！
至於另一預告片中，見到拳佬兩眼通紅咁對刁蘭講︰「點解偏偏要係你？點解你一直呃住我？」而刁蘭則淚流滿面咁話︰「我真係唔知可以點樣同你講…」 之後劇情會提到刁蘭見到朝猛山照片後性情大變，所以刁蘭極有可能與拳佬父親之死有關！
即使刁蘭哭着跪下，拳佬亦不回頭，默默地離去，因為「最難寬恕是欺騙」…
去片～