去年10月正式在港擺酒結婚的 楊怡 和羅仲謙，婚後一直相當恩愛，不時在網上放閃。不過最近有傳謙謙與內地女星朱銳拍激咀床戲前冇向阿怡備案，激嬲對方！得罪老婆大人，謙謙當然不敢怠慢，早前立即由台東飛到上海，陪老婆又玩又食又濕平，連人肉GPS都做埋！謙謙肯做阿四贖罪，羅太應該收貨唔再嬲豬啦！
拍床戲冇備案
早前有傳謙謙與有「男神收割機」之稱的內地女星朱銳，在電視劇《無間道》拍攝一場激咀床戲前，未有向阿怡備案，所以激親老婆，事後即刻在微博上載一張頭戴金剛箍的仔扭耳相隔空認錯。表面上只是兩公婆耍花槍，但其實阿怡的確因為謙謙冇備案而唔高興，回覆本刊記者時更語帶怒氣表示未睇過該場咀戲！
飛上海謝罪
心知阿怡動真火，身在台東拍戲的謙謙不敢怠慢，趁有兩個星期大假，立即急飛上海謝罪！本刊早前直擊阿怡謙謙甜蜜漫遊上海，兩人第一站先去到港人最愛的「佳家湯包」食lunch，雖然餐廳大排長龍，但謙謙為讓老婆試到新鮮蒸好的小籠包，仍肯冒住寒風企街排隊！
化身人肉GPS
食飽飽後，阿怡想去濕平買衫，但人生路不熟唔知去邊好，於是謙謙即時化身人肉GPS，拎住電話搵路，最終成功去到上海新天地瘋狂行街街！一入商場，楊怡已經花多眼亂不斷左望右望，九秒九衝入其中一間時裝店睇衫，而謙謙亦好識做，默默尾隨，見老婆拎起一件女裝牛仔褸，即幫眼俾意見，唔使十分鐘已經有斬穫。
十指緊扣放閃
開始進入忘我狀態的阿怡，買完衫後又衝去其他檔口睇頭箍，左揀右揀，買完頭箍再行過隔離舖頭睇眼鏡，逐副對住塊鏡試戴。之後楊怡又拉老公睇家品，對住一大堆卡通長襪愛不釋手，謙謙則全程罰企一樣乖乖呆等，丁點唔耐煩都冇！過足購物癮，楊怡見老公表現良好，即使沿途被唔少路人認出，仍肯當眾拖手，十指緊扣放閃！
努力造人
據知身為家中獨子的謙謙，一直希望楊怡盡快生B為羅家繼後香燈，加上現時謙謙事業開始扶搖直上，有能力擔起頭家養妻活兒，故近日一有時間即黐實老婆密密造人，嚟緊新年亦會由無錫趕返香港陪楊怡過年。謙謙咁努力造人，相信好快會有好消息！
文章来源：东方新地
Like Viralcham 面子书不出门也能知天下事 >